Catro recomendacións audiovisuais

Toupa — Wed, 15 Feb 2012 12:32:54 +0000

Engurras (Arrugas/Wrinkles) ven de estrear versión cinematográfica

Resulta moi complicado achegar novidades relacionadas co audiovisual, por iso é unha feliz coincidencia poder ofrecervos catro referencias tan interesantes.

A versión en DVD de Crebinsky, unha coidada edición de Pa Negre coa novela e a fita subtitulada ao galego e o DVD de 18 comidas son propostas que demostran o bo estado do cine galego e catalán durante os últimos anos.

Tamén chega da man de El Patito Editorial “Engurras“, a tradución ao galego da premiada banda deseñada de Paco Roca “Arrugas”. A recente estrea en cines da versión cinematográfica, producida pola galega Perro Verde Films, permite achegarse doutro xeito a esta emocionante historia e está sendo refrendada con éxitos como a preselección para os Óscar, xusto ás portas da nominación. De seguro que será outra vez protagonista na entrega dos Goya, onde está nominada por partida dobre.

Des-hibernando (un pouquiño)…

Toupa — Tue, 14 Feb 2012 21:09:33 +0000

… aínda que parece que cada vez fai máis frío ahí fóra. Son tempos difíciles, pero despois dun inverno tan longo á forza terá que chegar unha fermosa primavera ;)

O noso primeiro aniversario!!

Toupa — Wed, 04 May 2011 16:50:22 +0000

O noso primeiro aniversario!!

Como pasa o tempo! Fai un ano andabamos atacadiños dos nervios na toupeira… :)

Graciñas a todas e a todos por este 1º ano de Toupa.net !

Poesía e Fabas de Lourenzá

Toupa — Fri, 29 Apr 2011 17:03:19 +0000

Poesía e Fabas de Lourenzá

Tan contenta quedou a xente co guiso que Ugia Pedreira preparou no AchegArte que decidimos dar a oportunidade de repetir experiencia… cada un na súa casiña claro :)

Coa colaboración da nosa querida Marina xuntamos os ingredientes básicos: poesía da Mariña, fabas de lourenzá e de agasallo a receita do guiso. Iso si, reservámonos o segredo do picante daquel día. Aí, xa cada un terá que salpimentar segundo prefira ;)

Estamos (case) de aniversario !!

Toupa — Wed, 27 Apr 2011 09:30:06 +0000

1º aniversario | 04 de maio de 2011

Como pasa o tempo!! Parece que foi onte cando estabamos cos últimos retoques na toupeira e agardando que todo funcionase ben o día do lanzamento: o 4 de maio de 2010… e xa vai un ano!

Polo camiño creamos 3.000 fichas de artigos, autores e editoras, que traballiño!

Ademais, con máis de 1.300 usuarios e usuarias rexistradas en Toupa.net e con 2.200 amigos e amigas entre facebook e twitter arroupándonos… que máis podemos pedir para este primeiro ano de vida?

Por iso, e só para os que estivéchedes máis preto de nós neste primeiro ano, queremos facervos un pequeno agasallo de aniversario:

Os pedidos que realicedes na
Toupa.net ata o 08 de maio
enviaranse sen gastos de envío !

.
E cales son as condicións? Moi sinxelas:

Á hora de finalizar o pedido seleccionade a opción de envío Entrega Especial, que nós o enviaremos automáticamente por servizo ordinario sen custo adicional.
.
Esta promoción é válida para todos os pedidos de calquera importe que se realicen entre o mércores 27 de abril ás 10:00 e o domingo 8 de maio de 2011 ás 23:59 (os pedidos da fin de semana considéranse realizados o luns, que é o primeiro día hábil)
A promoción é válida só para envíos a enderezos na Península Ibérica

Para o resto de circunstancias aplícanse as nosas condicións de servizo habituais. E por suposto, consultádenos calquera dúbida que teñades. Graciñas a tod@s!! ;)

Chegan as camisolas de Tinta de Lura!

Toupa — Sun, 03 Apr 2011 10:19:47 +0000

Camisolas Tinta de Lura

Xa estamos no segundo día do AchegArte e hoxe queremos falarvos dun proxecto que se presenta en sociedade na feira e ademais cun dos stands mais bonitos, cheo de luras e choquiños. Tamén é certo que entre animaliños as cousas sempre se levan mellor :)

Luras e Choquiños no AchegArte!

Tinta de Lura introduce textos de poetas galegos nun soporte tan visible como son as camisolas. Unha xenial idea que xa está dispoñible na Toupa :)

Guiso e Parolada no Achegarte con Ugia Pedreira

Toupa — Thu, 31 Mar 2011 16:09:56 +0000

Guiso e Parolada no Achegarte con Ugia Pedreira

Cando? Onde?

O sábado 2 de abril ás 19:00 no noso stand en Achegarte (Palexco - A Coruña)

Que precisas para disfrutar dun ratiño de conversa con Ugia e unha cunca de guiso?

Só tes que ser cliente da Toupa (que teñas feito algún pedido) ou achegarte con algún disco ou libro no que participe Ugia, que tamén poderás mercar no stand.

Ah! o guiso é de fabas de lourenzá ;-)

Novidades musicais

Toupa — Thu, 24 Mar 2011 16:24:23 +0000

Continuamos falando sobre as novidades dos últimos días… e hoxe toca música!

Un disco ben interesante é o recompilatorio que lanza Quempallou. Cinco cortes de cada un dos seus discos, para celebrar once anos de festa enriba dos escenarios.

.
Pola súa banda Audia Records achegounos o disco de 3Azoteas (Miguel Queixas - batería, Pablo Pérez - baixo, Iago Mouriño- piano, teclados), un encontro musical dentro do jazz-fusion moi recomendable.

O pop e o indie están moi ben representados con lanzamentos como o novo proxecto de Eladio y los seres queridos. Os que xa coñecemos a Eladio sabemos do seu bó facer, e desta volta chega avalado pola mesma compañía que traballa con Xoel López e Vetusta Morla, así que non dubidedes que oiremos falar moito deste proxecto.

Por outra parte Ernie segue a afianzarse como un selo de referencia no panorama estatal con novos lanzamentos como o de Maryland ou os multipremiados Igloo.

O primeiro disco de Franc3s e a segunda referencia do selo Matapadre (Disco Las Palmeras!) chegaron tamén nas últimas semanas.

E finalmente, dúas propostas que nos envían directamente dous grupos de metal en galego: Deseqilibrio Mental e Traboute.

A disfrutalos! ;)

Novidades, novidades e algunha novidade máis

Toupa — Wed, 23 Mar 2011 14:20:05 +0000

Unha morea de novas referencias enchen a toupeira! Normalmente temos que andar furando entre catálogos de distribuidoras e almacéns, pero fainos especial ilusión que cada vez máis editoras e autores se poñan en contacto directamente connosco para enviarnos as súas obras. Como hai moito que contar decidimos facervos un resume cos novos libros que podedes atopar na Toupa.

Dende logo, o moi recomendable Indignádevos! está a ser a referencia estrela destes días, sen esquecer que cada día saen novas referencias arredor de Lois Pereiro… pero diso mellor falamos outro día, que dan para un post enteiro ;)

A nova editora que queremos destacar é Triqueta Verde, que nos envía tres referencias moi interesantes para público infantil, en edición bilingüe (galego e inglés). Gustounos especialmente Os Lunares de Lola, pero tamén sorprende Que lle acontece á avoa?, un conto onde se resalta, dunha forma divertida, a relación entre unha avoa con Alzheimer e a súa neta. A terceira referencia, xa para nenos un pouquiño máis maiores (>7), é A aprendizaxe de Betsy, traducción da obra de Dorothy Canfield Fisher, unha reformadora educacional e activista social de referencia durante o século XX.

Os lunares de Lola

Tamén chegados directamente dos seus autores temos os novos poemarios de Alfonso Rodríguez e de Alberte Momán, este último cunha obra a catro mans xunto a Alba Méndez, onde se introducen no universo de Rosalía de Castro. Quen tamén confiou en nós foi José Luis Sucasas, colaborador habitual en medios galegos.

Fáltanos algo? Seguro que si, pero como é un resume rematamos xa recomendando un libro do que estamos namorados e namoradas: O Paseo de Rosalía, unha nova xoia que nos achega Kalandraka.

O paseo de Rosalía

Mañá falamos de música! ;)